මනසින් ලෝකය දකින්නට ...

මනසින් ලෝකය දකින්නට ...

Monday, January 26, 2015

මහ මැතිවරණයේ සීතල යුද්ධය




    දින සියයයේ වැඩසටහනට ඇතුලත්වන විධායක ජනාධිපතිධූරයේ අත්තනෝමතික බලතල අඩුකිරීමත් ජනපතිවරයා සහ අගමැතිවරයා අතර බල තුලනයක් ඇතිකිරීමත් සමග නව ආණ්ඩුවක වැඩිකාර්යභාරයක් පැවරෙන්නේ අග්‍රාමාත්‍යවරයා ප්‍රමුඛ අමාත්‍ය මණ්ඩලයට බව පැහැදිලිය. එවැනි පසුබිමක මීලඟ මහ මැතිවරණයෙන් බිහිවන ජාතික ආණ්ඩුවේ අගමැතිවරයා තම පක්ෂයෙන් පත්කරගැනීමට ශ්‍රී ලංකා නිදහස් පක්ෂයත් එක්සත් ජාතික පක්ෂයත් විශාල උත්සාහයක නිරතවෙනු ඇත. කෙසේ නමුත් බිහිවී ඇති සමගි සන්ධානය තුල බාහිර ගැටුමකට යා නොහැකි හෙයින් පක්ෂ අභ්‍යන්තරික වශයෙන් මෙම සටන සඳහා දැනටමන් කඳවුරු බැඳීම අරඹා ඇත. යහපාලනය අපේක්ෂා කරන ජනතාවගේ විශ්වාසය සහ ජනපති වීමට පෙර මෛත්‍රීපාල සිරිසේන මහතා ඇතිකරගත් එකඟතාවයන් ආරක්ෂා කරනු පිණිස ඔහු නිර්පාක්ෂිකව මහ මැතිවරණය දෙස බලාසිටිනු ඇතැයි අපේක්ෂා කළ හැකිය. එසේ වුවහොත් ශ්‍රී ලංකා නිදහස් පක්ෂය හෝ එක්සත් ජනතා නිදහස් සන්ධානයේ  මහ මැතිවරණය මෙහෙයවීම චන්ද්‍රිකා කුමාරණතුංග හිටපු ජනපතිනිය වෙත පැවරෙනු ඇත. එහිදී ශ්‍රී ලංකා නිදහස් පක්ෂය තනිව තරඟ කිරීමට තීරණය කළ හොත් එය ඡන්ද පදනම අඩු පක්ෂ සඳහා විශාල පා පහරක් වනු ඇත. එවිට එම පක්ෂ කරනු ඇත්තේ මහින්ද රාජපක්ෂ මහතා සමග එක්වී තවත් පෙරමුණකින් මැතිවරණයට ඉදිරිපත්වීමය.
එජාපයද දින සියයයේ පොදු වැඩපිලිවෙන තම දෑතට ගෙන මේ අරඅදින්නේ මීලඟ මැතිවරණයේ බහුතරබලය තම පක්ෂය වෙත හිමිකරගනිමින් ජාතික ආණ්ඩුවේ සුක්කානම තවදුරටත් ආරක්ෂාකරගැනීමටය. 29 වැනිදා අතුරු අයවැය මගින් ලබාදෙන සහනද ඒ සඳහා පාර කපනු ඇත. කෙසේ නමුත් හංසයාට කතිරය ගැසූ සියලුදෙනා එජාපයට ඡන්දය නොදෙන බව ඔවුන් මතක තබාගත යුතුය. හංසයාට ලැබුනු ඡන්ද වලින් බහුතරය ඔවුන් සතුකරගැනීමට නම් දින සියයේ වැඩසටහන අකුරට ක්‍රියාත්මක කිරීම කළ යුතුය. ශ්‍රී ලංකා නිදහස් පක්ෂය දූෂිතයන් හට නාමයෝජනා නොදී ශක්තිමත්ව ඉදිරියට පැමිණියහොත් එජාපයට ඔවුන් හා තියුණු තරඟයකට මුහුණපෑමට සිදුවේ. එසේම විමල් වීරවංශ උත්සාහ කරන පරිදි මහින්ද රාජපක්ෂ පෙරමුණක්ද පැමිණියහොත් සිදුවන්නේ මැතිවරණය යම් ජරාජීර්ණ වාචාලකතා වලින් පිරුණු එකක් වීමය. කෙසේ නමුත් එවැනි පෙරමුණක් පැමිණියහොත් එය ජාතිවාදීන්ටයට සහ වාචාලයන්ට ඇති සැබෑ ජනතා කැමැත්ත කෙසේදැයි දැනගැනීමට අවස්ථාවක් වනු ඇත.
    එසේම රැඩිකල් මතවාදී පිරිස් මේ වන විට ජනතා විමුක්ති පෙරමුණට විශාල ඇල්මක් දක්වන අතර එය ඡන්ද බවට පත්කරගැනීමට ජනතා විමුක්ති පෙරමුණද තම මෙහෙයුම අරඹා තිබේ. දූෂිතයන්ට නඩු පවරා නීතිමය ක්‍රියාමාර්ග ගැනීම හංසයායේ දැනුවත් ඡන්ද සීනුව වෙත අද්දවාගැනීමට රුකුලක් වී ඇත. දූෂිතයන්ට එරෙහිව ක්‍රියාමාර්ග ගැනීමේදී අනෙක් පාර්ශවයක් ඇල්මැරුනු ස්වභාවයක් ගැනීම නිසා ජනතාව යම් කලකිරීමකට පත්වී සිටීමද ජනතා විමුක්ති පෙරමුණේ ජනප්‍රියතාවය ඉහලයාමට හේතුවක් වී ඇත. මන්ද යත් මහින්ද ස්ටෝර්ස් වසා දැමිය යුතු වුවත් මෛත්‍රී ස්ටෝර්ස් ගැන සහතිකයක් දිය නොහැකි ලෙස ජවිපෙ පැවසූ දෙය සත්‍යක් බව ඇතමුන් විශ්වාස කරන නිසාය. ජනතා විමුක්ති පෙරමුණද තම මන්ත්‍රීධූර සංඛ්‍යාව ඉහල නංවා ගැනීම සඳහා විශාල උත්සාහයක නිරතවන අතර ජාතික විධායක සභාව හරහා අනුර දිසානායක මන්ත්‍රීවරයා ඉටුකරවාගන්නා කාරණා එයට මහත් පිටිවහලක් වනු ඇත.
හෙළ උරුමයද ප්‍රධාන පක්ෂ දෙකෙන් එකක් හා එක්වීමට ඉඩකඩ ඇති අතර හංසයා සමගින් පෙරමුණක් ගොඩනගාගැනීමද ඔවුනට ඇති එක් අවස්ථාවකි. මධ්‍යස්ථ කණ්ඩායම්වල විශ්වාසය පවත්වාගැනීමට සමත්වුවහොත් එකී අභියෝගය තුලින් යම් ඡන්ද පදනමක් ගොඩනගාගැනීමට හැකිවනු ඇත. නමුත් ඒ සදහා නව ප්‍රජාතන්ත්‍රවාදී පෙරමුණ සහ එහි සංකේතය භාවිතාකිරීම පිලිබ අනෙක් පක්ෂ සමග එකගතාවයකට පැමිණීමද වැදගත්වේ. එසේම මැදමුලන වහල්භාවයෙන් මිදීමට නොහැකි පිරිසද පෙරමුණක් ලෙස පැමිණියහොත් මැතිවරණය සුපුරුදු මඩගොහොරුවක් වනු ඇත. වෙනසක් අපේක්ෂාකරන අප පතන්නේ එවැන්නක් සිදු නොවන ලෙසය. මෙවැනි වටපිටාවක ඉදිරි මැතිවරණයේදී අපට දැකගත හැකිවන්නේ එකට සිටිමින් තම මන්ත්‍රීවරුන් ගණන වැඩිකරගැනීම සඳහා ශ්‍රී ලංකා නිදහස් පක්ෂය, එක්සත් ජාතික පක්ෂය සහ ජනතා විමුක්ති පෙරමුණ සීතල යුද්ධයක නිරතවන ආකාරයය.  එය ශ්‍රී ලාංකික ජනතාවට අලුත් අත්දැකීමක් වනු ඇත.

සංවාදයට විවෘතයි

Wednesday, December 17, 2014

මෛත්‍රී පැළඳවූ මහින්දගේ රජ කිරුළ ගැලවුනු හැටි




         ඔබ මා මේ දිනවල හෙලුදරව්ව නමින් නිතර දකින වීඩියෝවෙන් කියවෙන්නේ මෛත්‍රීපාල සිරිසේන මහතා ත්‍රස්තවාදය පරාජය කිරීමෙන් අනතුරුව මහින්ද රාජපක්ෂ ජනපතිවරයා රජකු හා සමාන කරන ආකාරයයි. එම දැන්වීම ඔවුන් පලකරන්නේ මෛත්‍රීපාල සිරිසේන මහතාගේ ප්‍රකාශවල වලංගුභාවය ඔවුන්ද පිලිගන්නා බැවිනි. නමුත් මෛත්‍රීපාල සිරිසේන මහතා පැලඳවූ එම රජ කිරුළ රැකගන්නට මහින්ද රාජපක්ෂට නොහැකි විය. එසේ වූයේ ඔහුට යුද්ධය කරන්නට සිටි අති දක්ෂ සෙනෙවියන් රට හදන්නට ‍නොමැති වීම නිසාය. මහින්ද රාජපක්ෂ රට හැදීමේ යුද්ධය සිදුකළේ සොරමුලක් සමගය. එම සොරමුලට නොඅඩු නායකත්වයක් ඔහුගෙන් සැපයිනි. බෝක්කුවක් හදන්නට පාලමකට අවශ්‍ය ප්‍රමාණයේ ණයක් ගෙන ඉතිරිය සාක්කුවේ දමාගැනීමට මෙකී කල්ලිය සමර්ථකම් දැක්වීය. ජනතාවටද එකී ඉදිකිරීම් ආශ්චර්යයක් වූ නිසාත් වචන පාචනය ඇති එවුන් උදේ හවා දේශප්‍රේමී බණ වැපිරූ නිසාත් එම මගඩිය ජයටම කරගෙන යන්නට ඔවුනට පහසු විය. සාමාන්‍යයෙන් ඒකාධිපතියන් සිදුකරන විරුද්ධවාදීන්ගෙන් පලිගැනීමේ ක්‍රමවේදයෙන් බැහැරව විරුද්ධවාදියාට වරප්‍රසාද දී තමාගේ ගැත්තකු කරගැනීමද මෙකී ක්‍රියාවලිය කිසිදු බාධාවකින් තොරව කරගෙන යාමට රාජපක්ෂ පවුලට ශක්තියක් විය. ඔවුන් විසින් සිදුකරන බොහෝ ව්‍යෘපෘති මහාපරිමාණ ඒවා වූයේ ඒවායෙන් කොමිස් ලබාගැනීම හෝ දූෂණ සිදුකිරීම පහසු වූ නිසාය. එසේම ඒ කිසිදු ව්‍යාපෘතියක් සඳහා ජනතා අදහස් විමසීමක් දක්නට නොලැබිණි.
     මෙම ක්‍රියාවලියේදී ඇතැම් ඇමතිවරුන් අනියම් ලෙස තම වත්කම් වැඩිකරගත් බවටද වංචා හා දූෂණ විමර්ශණ කොමිසමට පැමිණිලි ලැබී තිබුණද ඒවා සියල්ල යටපත් වූයේ  කෙසේදැයි ‍නොරහසකි. ජනපතිවරයා දැන් පවසන පරිදි ලිපිගොනු ඇත්තේ ඔහු ලඟය. මේ අනුව අපට පෙනෙන්නේ යුක්තිය සාධාරණත්වය ඉටුකරමින් ගිය ගමනක් නොව තම දේශපාලන පැවැත්ම උදෙසා කප්පම්කරුවකු ලෙස ගිය ගමනකි.  මෙම කාරණා විවිධ මාධ්‍ය ඔස්සේ ජනතාව වෙත කාන්දු වී අද දින වන විට ආණ්ඩුව කුමන ආකාරයේ එකක් දැයි සියලු දෙනාට පෙනී ගොස් ඇත. එම තත්වය යටතේ රජකු ලෙස පෙනී සිටි මහින්ද රාජපක්ෂ මහතාගේ රජකම දැන් අවලංගු වී ඇති බව විපක්ෂ බලවේගය සමග ජනතාව එක්රොක් වන ආකාරයෙන් පෙනී යයි. එම තත්වයට මූලික වූයේ සන්ධාන රජයේ සිටි ජනතා පිලිගැනීම වැඩි මහත්මා දේශපාලනඥයකු වූ මෛත්‍රීපාල සිරිසේන මහතා විපක්ෂයේ පොදු අපෙ‍්ක්ෂකයා වී රාජපක්ෂ රෙජිමයේ හෙලුව සියලුදෙනාට පැවසීමත් සමගය.  මෛත්‍රීපාල සිරිසේන මහතා එදා පැවසූ රජකම අද මහින්ද රාජපක්ෂ මහතාට අදාල නොවන්නේ පසුගිය වසර 04ක කාලය තුල සිදුකළ ක්‍රියාකාරකම් නිසා එම කිරුළ ගැලවී ගොස් තිබීම නිසාය. එය පවසන්නේ වෙන කිසිවෙකුත් නොව එදා රජකම පැවරූ මෛත්‍රීපාල සිරිසේන මහතාමය. එබැවින් හෙලුදරව්ව නමින් වීඩියෝවක් ප්‍රචාරය කරන අයට කියන්නට තිබෙන්නේ ඔබ මෛත්‍රීපාල සිරිසේන මහතා එදා කී දේ විශ්වාස කරන්නේ නම් අද ඔහු පවසන දෙයද විශ්වාස කරන ලෙසය.
 


සංවාදයට විවෘතයි

Monday, December 15, 2014

2005 සිට 2015 දක්වා




2001 වසරේ ඇමරිකාවේ ලෝක වෙළඳ මධ්‍යස්ථානයට එල්ලවූ ප්‍රහාරයෙන් පසුව ත්‍රස්තවාදීන් බවට පත්වූ කණ්ඩායම් ඊට පෙර හැඳින්වූයේ කැරලිකාර කණ්ඩායම් ලෙසය. ඔවුනගේ ක්‍රියාකාරකම් අයිතිවාසිකම් දිනාගැනීමේ ක්‍රියාමාර්ග ලෙස බටහිර රටවල් දැඩි මතයක සිටියහ. ලෝක දේශපාලනය එවැනි මට්ටමක තිබුණ බැවින් කුරිරු එල්ටීටීඊ ත්‍රස්තවාදීන්ටද ලැබුනේ එකී අගයමය. එවැනි වටපිටාවක එම ත්‍රස්තවාදය පැරදවීමට උත්සාහ කළ අපරටේ නායකයන් බොහෝ දෙනෙකුට සිදුවූයේ විදේශ බලපෑම් මත එම සටන් අවසාන මොහොතේම අතහැර දැමීමටය.
  එනමුත් 2001 ප්‍රහාරයෙන් අනතුරුව ත්‍රස්තවාදයෙහි ඇති අධම බව බටහිර ලෝකයට දැනුනේ මරණ බයද සමගිනි. ත්‍රස්තවාදය සහ අයිතිවාසිකම් උදෙසා කරන සටන් අතර පරතරයක් ඇතිබව ඔවුන් වටහා ගත්තේ අප රටටද එල්ටීටීඊ ත්‍රස්තවාදයෙන් අපමණ හානි වූ පසුවය. ඉන් අනතුරුව ඇමරිකාව ප්‍රමුඛ බටහිර ලෝකය අල්කයිඩා ආදී ත්‍රස්තවාදීන්ට කිසිදු සමාවක් නොදී අවියෙන්ම පිලිතුරු දීමට පටන් ගත්හ. පෙරකල සාමයෙන් විසඳන්නට යැයි අපට උපදෙස් දුන් ලෝක බලවතුන් තම උපරිම යුධ බලය එකී කැරලිකරුවන් විනාශකර දැමීමට යොදන ලදී.
මෙම වකවානුව වන විට අප රටේ රනිල් වික්‍රමසිංහ ආණ්ඩුව යටතේ සටන් විරාම ගිවිසුමක් ක්‍රියාත්මක වූ අතර එයට මුවාවෙමින් එල්ටීටීඊ ත්‍රස්තවාදීන් තම ඉලක්කය වූ ඊලම දිනාගැනීම සඳහා මීලඟ යුද්ධය සිදුකිරීමට අවශ්‍ය අවිබලය සහ පිරිස් බලය රැස්කරමින් සිටියහ. ඉන් අනතුරුව එල්ටීටීයට අවශ්‍ය වූයේ සටන් විරාමය හෝ අන්තර්පාලනය නොම මස් රාත්තලම ලබාගැනීමටය. එනම් රජය සටනකට පටලවාගෙන ඊලම දිනාගැනීමය. එය රනිල් වික්‍රමසිංහ ජනපතිකරවීම මගින් කිසිසේත් ඉටු නොවන නිසා මහින්ද රාජපක්ෂ මහතා දිනවීමට එල්ටීටීය උතුරේ ඡන්ද වර්ජනයක් සිදුකරන ලදී. එමගින් ඔවුන් සිතුවේ යුධමය වශයෙන් ශක්තිමත් බැවින් රජය යුද්ධයකට පටලවාගෙන ඊලම ලබාගන්නටය. එවකට මහින්ද රාජපක්ෂ මහතා සාමකාමී විසඳුමක් ගැන කථාකළද එතුමා සමග සිටි ජනතා විමුක්ති පෙරමුණ සහ ජාතික හෙළ උරුමය වැනි ජාතිමාමක බලවේග නිසා සටන් විරාමය බිඳ යුද්ධයකට එළඹීම පහසු වනු ඇතැයි ඔවුන් සිතන්නට ඇත.
       එල්ටීටීය තම අරමුණ සාර්ථක කරගකරගන්නට සාම සාකච්ඡා වලින් ඉවත් වූ අතර මාවිල්ආරු සොරොව්ව වසා ආණ්ඩුවට යුද්ධයට නොනිලඇරයුමක් කළේය. ඒ වන විටත් රට තුල එල්ටීටීය පරාජය කිරීමට අවශ්‍ය ජනතා පසුබිම සකස් කරන්නට ජවිපෙ සහ ජාතික හෙළ උරුමය ප්‍රමුඛ ජාතිමාමක බලවේග ක්‍රියා ක්‍රියාත්මක වෙමින් තිබිණ. ඒ වන විට ලෝක දේශපාලනය තුල එල්ටීටීය සහා ත්‍රස්තවාදී ලේබලය ඇලවීමට අවශ්‍ය පසුබිම සැකසී තිබූ අතර මාවිල්ආරු සොරොව්ව වැසීමෙන් ඇතිවූ තත්වය අප රටට වෙස්වලාගත් ආශිර්වාදයක් මෙන් විය. එවැනි තත්වයකදී ත්‍රස්තවාදය යුධමය වශයෙන් පරාජය කරන ලෙස ජාතිමාමක බලවේග ජනපතිවරයාට බලකර සිටිනු ලැබූ අතර ඒ අනුව එල්ටීටීඊය බලාපොරොත්තුවූ සටන ඇරඹිණි. ඒ කෙරෙහි පෙර පරිදි ඉන්දියාව හෝ වෙනත් රටක් බලපෑම් කරන්නට ඉදිරිපත් නොවූයේ ඒ වන විට ඉන්දියාවත් ත්‍රස්තවාදී තර්ජන වලින් පීඩාවට පත්වී සිටි බැවිනි.  ඒ වන විටත් අප රටේ ආරක්ෂක අංශ මනාව සැලසුම් කර තිබූ සටන එල්ටීටීය ලක් පොලොවෙන් අතුගා දමන තෙක් නතර නොවීය. ජයග්‍රාහී ගමනකින් අනතුරුව 2009 මැයි මස ප්‍රභාකරන්ගේ අවසානයත් සමග අප රටට නව මාවතක් විවර විය.
   ඉන් අනතුරුව මහින්ද රාජපක්ෂ මහතා ත්‍රස්තවාදයෙන් රට මුදාගත් වීරත්වය පුද්ගලිකවම පවරාගත් අතර එය සන්ධාන ආණ්ඩුවේ දේශපාලන පැවැත්ම තහවුරු කිරීමට මහත් පිටිවහලක් විය. 2010 වසරේ පැවති මැතිවරණ වලදී  අති විශාල ජයග්‍රහණයන් ලබාගැනීමට මහින්ද රාජපක්ෂ මහතා ප්‍රමුඛ සන්ධාන ආණ්ඩුව සමත් විය. එම මැතිවරණ වලදී ඔවුන් පැවසුවේ ලොව දරුණුම ත්‍රස්තවාදය ජයගත් ඔවුනට රට හදන අභීයෝගය කජ්ජක් බවය. සංවර්ධනයේ නාමයෙන් රාජපක්ෂ පාලනය නොයෙකුත් දේ ක්‍රියාත්මක කරන ලද අතර තමාට ලැබුන ජනවරම උපයෝගී කරගෙන තම ජනපති තනතුර දැරීමේ වාර ගණන අසීමිත කර ගැනීමටද මහින්ද රාජපක්ෂ මහතා සමත් විය. මේ සියලු දේ සමගින් අප පැමිණ ඇත්තේ මහින්ද රාජපක්ෂ මහතා සතුකරගත් යුධ වීරත්වය රට ගොඩනැගීමේ වීරත්වයකට පරිවර්තනය වූවාදැයි ජනතාවගෙන් කෙරෙන විමසීමයට. ඒ තීරණය බුද්ධීමත් ඔබ සතුය.


සංවාදයට විවෘතයි

දෙවැනි සටනට සූදානම් වන්න


           
         ජනපතිවරණයකදී අපේක්ෂකායාගේ දේශපාලනික වලංගුභාවය මතම ජයග්‍රහණයෙන් අඩක් ලැබෙන බව ඕනෑම කෙනෙකුට වැටහෙන කරුණකි. ඒ අනුව පොදු විපක්ෂ බලවේගය විසින් මෛත්‍රීපාල සිරිසේන මහතා ජනපතිවරණ පොදු අපේක්ෂකයා ලෙස ඉදිරිපත්කිරීමන් ඇතිවූ ජනතා පිබිදීම එයට කදිම නිදසුනකි. යම් සමාජ දැනුමක් ඇති සියලුදෙනා ඉන් අනතුරුව මෛත්‍රීපාල සිරිසේන මහතා වෙනුවෙන් ස්වේච්ඡාවෙන්ම පෙනී සිටීමට පටන් ගත්හ. විපක්ෂය පවා විවේඡනය කළ වෙබ් පිටු කොන්දේසි විරහිතව පොදු වැඩපිලිවෙලට සහය දීමද විපක්ෂ බලවේගයට මහත් ශක්තියක් විය.
  කෙසේ නමුත් අන්තර්ජාලය තුල නියෝජනය වන ජනමතය රටේ පොදු ජනමතය නොවන බව අප හොඳින් තේරුම් ගත යුතුය. අන්තර්ජාලයෙහි පවත්වන මත විමසුම් මගින් ලැබෙන ප්‍රතිඵල සහ රාජපක්ෂ රෙජිමයේ දේශපාලනික ගැටවලට හසුවී ඇති අහිංසක ගැමි ජනතාවගේ අදහස් අතර දැඩි වෙනසක් පවතී. එමෙන්ම අන්තර්ජාලය පරිහරණය නොකරන පිරිසට එම පණිවුඩය ගෙනයාමද ජනපතිවරණ ප්‍රචාරක වැඩපිලිවෙලේ ප්‍රධානම අංගයක් විය යුතුය.
    මෙතෙක් නිකුත් වී නොමැති පොදු විපක්ෂයේ ප්‍රතිපත්ති ප්‍රකාශනය සහ වැඩපිලිවෙල මෙම කාර්යයට මහත් පිටිවහලක් වනු ඇතැයි වේදිකාවේ ඇසෙන කථා වලින් පෙනී යයි. ඇතැම් දේශපාලනඥයන් ලබාදෙන පොරොන්දුද එම වැඩපිලිවෙලට ඇතුලත් වනු ඇතැයි අපට අපේක්ෂාකළ හැකිය. නමුත් දේශපාලනික උපක්‍රමයක් ලෙස ප්‍රතිපත්ති ප්‍රකාශනය එලිදැක්වීම මහින්ද රාජපක්ෂ මහතාගේ ප්‍රතිපත්ති ප්‍රකාශනය ඉදිරිපත්කිරීම තෙක් ප්‍රමාද කිරීමට සිදුවී තිබේ. එසේ නොකලහොත් මෛත්‍රී පාලන වැඩපිලිවෙල දෙගුණ කර මහින්ද චින්තනය ලෙස ජනතාවට ඉදිරිපත් කරනු ඇත.
    පොදු වැඩපිලිවෙල එලිදැක්වූ පසු අනෙකුත් නොවැදගත් තර්ක නවතා දමා එහි ඇති කරුණු ජනතාවට ගෙනයාම අප සැමගේ වගකීමයි.  අන්තර්ජාල පරිශීලකයන් මෙන්ම බිම්මට්ටමේ ක්‍රියාකාරීන් තම උපරිමයෙන් ජනතාව දැනුවත් කිරීම අපගේ ජයග්‍රහණය තහවුරු කිරීමට හේතුවෙයි. එසේ නොමැතිව අන්තර්ජාලයේ හෝ ජනහමුවල ඇති බලය සැබෑ ජනමතය ලෙස සිතා උද්දාමයෙන් සිටියහොත් සියලු රාජ්‍ය බලයද හිමි රාජපක්ෂ පවුල අප ඉක්මවා යනු ඇත. එබැවින් ප්‍රීතිඝෝෂා වෙනුවට රාජපක්ෂලාගේ මුලාවෙන් මත්වී ඇති එක් ඡන්දයක් හෝ විපක්ෂ වැඩපිලිවෙලට එක්කර ගැනීම අපට ඇති වගකීමයි. එසේ කිරීමට අපට සිදුවන්නේ රට ගොඩගැනීමට ඇති අවසාන අවස්ථාව අප අභිමුවට පැමිණ ඇති බැවිනි.



සංවාදයට විවෘතයි

Tuesday, December 2, 2014

හෘද සාක්ෂිය ඔබට සමාව නොදෙනු ඇත




     විමල් වීරවංශ යනු සැබැවින්ම දක්ෂ කථිකයෙකි. භාෂාවේ හැම මුල්ලකම ඇති වචන කලතා පෙරා ජනතාවට පෙවීමට ඔහුට උපන් හපන්කමක් ඇත. අප ඔහුගේ එම දස්කම් හඳුනාගත්තේ ජනතා විමුක්ති පෙරමුණ තුල ප්‍රචාරක ලේකම් වරයා ලෙස කළ කාර්යභාරයත් සමගිනි. වර්තමානයේ අනුර කුමාර දිසානායක මහතා රූපවාහිනියේ දකිනවිට එක්සත් ජාතික පාක්ෂිකයන් සහ නිදහස් පාක්ෂිකයන් පවා පවසන්නේ මොනව වුනත් මිනිහ කියන දේ ඇත්ත යනුවෙනි. ඒ හා සමාන ගෞරවයක් එකල විමල් වීරවංශ මහතා කෙරෙහි පැවතිණි. නමුත් 2005 වසරෙන් පසුව  සංධාන ආණ්ඩුවේ කාර්යයන් ඉටුකරන්නට යෙදුනු විමල් වීරවංශ මහතාට තම මහගෙදර වූ ජනතා විමුක්ති පෙරමුණේ සැප පහසුකම් අඩු දේශපාලන පිලිවෙත අරලියගහ මන්දිරයේ සැප සමග සසඳන්නට සිතුනි. ජනතා විමුක්ති පෙරමුණේ කළ කැපකිරීම් නිසා තම ජීවිතයට සැපක් නොලැබුණ බව ඔහුට වැටහිනි.
   එකී සුඛදායක චින්තන‍යට ලොල්වුනු එතුමා පාර්ලිමේන්තුවේ කඳුලු සලා තම සැපත සොයා තමාගේ දේශපාලන මහගෙදරින් නික්ම ගියේය. එහෙත් අරලියගහ මැදුරේ සේවය සැමදා ස්ථීර නොවන බැවින් තමාගේ පැරණි දේශපාලන මත තවත් මාර්කට් කළ හැකි සටන්පාඨ කිහිපයක් මිශ්‍රකර ජාතික නිදහස් පෙරමුණ නමින් පක්ෂයක්ද පිහිටුවා ගත්තේය. ඒ කෙසේ නමුත් තමාගේ සුපුරුදු අධිරාජ්‍යවාදී කුමන්ත්‍රණ සටන්පාඨයද කිසිවිටෙක ඔහු විසින් අත් නොහැරියේය. ත්‍රස්තවාදයට එරෙහි ජයග්‍රහණයෙන් තව දුරටත් වලංගු වුනු ඔහුගේ සටන් පාඨ විපක්ෂයේ සිටි රනිල් වික්‍රමසිංහ වැනි නායකයන් පාගා ගැනීමට තරම් ශක්තිමත් විය. ඊට අමතරව සටන් විරාම ගිවිසුම පිලිබඳ කළ විවේචන මගින්ම ජනතාව තුල රනිල් වික්‍රමසිංහ පිලිබඳව ජනතාව තුල මහා පිලිබඳ භීතිකාවක් ගොඩනැගීමටද විමල් වීරවංශ සමත් විය.
       කාලයත් සමග යුධ ජයග්‍රහණයේ දේශපාලනික ප්‍රතිලාභය ක්‍රමයෙන් දියවී යද්දී විමල් වීරවංශ මහතා ක්‍රියාකරන්නේ ඒ පිළිබඳ අවබෝධයකින් තොරවය. ඔහු තවමත් කථා කරන්නේ 2009 වසරේ කථා කළ ඒවා මය. රූපවාහිනී විවාදයකදී විමල් වීරවංශ මහතා පැවසූයේ වසර 05ක් යනු කෙටි කාලයක් බවය. ඒසේම පොදු අපේක්ෂකයා පිළිබඳ කරුණු කියද්දී ඔහුගේ මුවගට සිනහ නැගෙයි. ඒ කුමන කරුණක් නිසා දැයි අපට සිතාගත නොහැකිය. නමුත් එදා අප දුටු දක්ෂ කථිකයා හෝ අවංක දේශපාලකයා අද සිටිනා විමල් වීරවංශ තුල දක්නට නොමැත.
    මීට ටික කාලයකට ඉහතදී රතන හිමියන් ආණ්ඩුව සමග කේවල් කරන්නටත් පෙර විමල් වීරවංශ මහතා ආණ්ඩුව සමග විශාල ගැටුමක් ඇතිකර ගත්තේය. අපට සිතුනේ ඉතා කෙටිකලකින් ඔහු ආණ්ඩුවෙන් ඉවත්වේය කියාය. ඔහු කීවේ ආර්ථික ඝාතකයන් ගැන පැවසූ ඔහු මුදල් අමාත්‍යාංශයේ ලේකම් වරයා දැඩි ලෙස විවේචනය කළේය. එම චෝදනා සිදුකරන විට මුදල් ඇමතිවරයා මහින්ද රාජපක්ෂ මහතා බව අමතක වූවා විය යුතුය. මක් නිසාද යත් අරලියගහ මන්දිරයට යන එන විට එකී චෝදනා ඉතා සරලව ජනපතිවරයාට යොමු කළ හැකිව තිබූ බැවිනි. නමුත් එකී විවේචන සියල්ල පසුව අවලංගු වූයේ උව පලාත් සභාවේ බදුල්ල දිස්ත්‍රික්කයට තම පක්ෂය තනිව තරඟවැදී අත් වූ ඉරණමත් සමගය. එහිදී ඔහු වටහා ගත්තේ හවුලේ මිස තනිව ගමනක් නැති බවය.
   මේ වන විට ඉතා උණුසුම් වී ඇති ජනපතිවරණ සටනේ ප්‍රමුඛම කථිකයා වී ඇත්තේ විමල් වීරවංශ මහතාය. ඒ අන් කිසිවක් නිසා නොව සංධානයේ අනෙකුත් නායකයන් තම හෘද සාක්ෂියට එකඟව පසුබා සිටීම නිසාය. සංධානය තුල සිටින නායකයන් මෛත්‍රිපාල සිරිසේන මහතාගේ තීරණය හේතුවෙන් වික්ෂිප්ත බවට පත්වී සිටින බවක් පෙනෙන්නට තිබෙයි. එසේම ඔවුන් හට පරාජයේ සේයාවද පෙනී ඇති නිසා මාධ්‍ය ඉදිරියේ පවසන්නේද ඉතාම බොලඳ කාරනාය. මෙවැනි වටපිටාවක් තුල විමල් වීරවංශ මහතාගේ තාක්ෂණික වචන කට්ටලයට නැවත පණදීමට මහගු අවස්ථාවක් දැන් ලැබී තිබේ.
එසේම අනුන්ගේ පුවත් කොපි පේස්ට් කිරීමට අටවාගත් ලංකා සී නිවුස් නම් වෙබ් අඩවියද මේ වන විට අනුන්ගේ පුවත් කොපි පේස්ට් කිරීමට අමතරව එඩිට් කිරීමටද පටන්ගෙන තිබේ. තම පහත් දේශපාලනය පිලිබිඹු කරමින් කිසිදු සත්‍යතාවයක් හෝ වැදගත්කමක් නොමැති කරුණු අන් අයට අපහාස කිරීමේ අරමුණෙන් එකීවෙබ් අඩවිය තුල දක්නට ලැබේ. ජනතා විමුක්ති පෙරමුණ තුල පවතින ශිෂ්ඨ දේශපාලනයේ සිට මෙවැනි තුච්ච දේශපාලනයක් දක්වා ඔහු රැගෙන ගියේ අප රටේ පවතින දූෂිත දේශපාලන සංස්කෘතියයි. එම තත්වයට පත්වූ විමල් වීරවංශ මහතාට දැන් තමා පවසනදේ සත්‍ය හෝ තර්කානුකූලදැයි වැදගත් වන්නේ නැත. ඔහු දැන් කරන්නේ තමාට සැපත  උදාකළ නායකයා පරාජයේ ශෝකයෙන් අස්වැසීමයි. නමුත් දේශපාලනිකව ඔහු කරන්නේ කුමක්දැයි ඔහුගේ හෘද සාක්ෂිය දන්නවා ඇත. කෙතරම් සදාචාර සම්පන්න නොවන දේශපාලනයක නිරත වුවද මෛත්‍රියෙන් ගමනක් යන අපගෙන් ඔබට හිරිහැරයක් නොමැත. එහෙත් අසත්‍ය වපුරා කරන චරිත ඝාතන වලට ඔබගේ හෘද සාක්ෂියෙන් සමාවක් නොලැබෙනු ඇත. 

සංවාදයට විවෘතයි