මනසින් ලෝකය දකින්නට ...

මනසින් ලෝකය දකින්නට ...

Tuesday, December 22, 2015

බල්ටි නැති විසිල් ජාත්‍යාලය





හෙළයා ගැන නම් මා කියන්නට යන්නේ නැත. එහෙත් මිහිඳු හිමියන් පැමිණෙන විට ලක්දිව යනු විවිධාකාර ජන කොටස්වල එකතුවකි. ගෝත්‍රිකයන් ඉන්දියානු සංක්‍රමණිකයන් ඇතුලු ප්‍රධාන ජන කොටස් එක ලංකාවේ වාසය කළහ. එහෙත් සියලු ශ්‍රී ලංකිකයන් එකම ජාතියක් කරනු වස් මිහිඳු හිමියන්ගේ අනුශාසනා පරිදි දෙවනපෑතිස් රජතුමාගේ පාලන කාලයේදී එකී සියලු ජන කණ්ඩායම් සඳහා බුද්ධ ශාසනයේ උතුම් පැවිදි බව ලැබීමට අවස්ථාව ලැබිණි. මේ හේතුවෙන් ශ්‍රී ලාංකිකයන් එකම සිංහල ජාතියක් බවට පත්විය. එහෙත් ඉන් පසුව පැමිණි විවිධ ජන කණ්ඩායම් තම මුල් ආගම් ව්‍යාප්ත කරමින් ජීවත් වීමත් සංස්කෘතික අනන්‍යතා ගොඩනගාගැනීමත් නිසා සියලු ශ්‍රී ලාංකිකයන් බෞද්ධයන් වීම හෙ‍ා් සිංහලයන් වීම ඉන් පසු සිදු නොවීය.
  එසේම ශ්‍රී ලංකාවේ ඉස්ලාම් ආගම අදහන ජනතාවගෙන් කොටසක් මුස්ලිම් ව්‍යාප්තවාදයේ ගොදුරක් වීම හේතුවෙන් සාමකාමී සිංහල ජනයාටද තම අනාගතය පිළිබඳ විශාල කුකුසකට මුහුණදීමටද සිදුව ඇත. එම සැකය මත සිංහල ජනයා තම ජාතියේ අනන්‍යතාවය වෙනුවෙන් පෙනී සිටීම කිසිදු ජාතියක හෝ ආගමක විරසකයකට හේතුවිය යුතු නොවේ. අභිමානවත් ශ්‍රී ලංකිකයකු ලෙස ජීවත් වීමට කිසිදු ආගම් අදහන්නකුට ලංකාව තුල කිසිදු බාධාවක් නොමැත. එහෙත් ව්‍යාප්තවාදයට අප රට තුල කිසිදු ඉඩක් නැත.
එසේම සිංහල ජාතිය නගාසිටුවන්නට සිංහලේ කියා විසිල් ගසා වැඩක් නැත.බුදු දහමෙන් තොර සිංහල ජාතියක්ද නැත. එබැවින් සිංහල ජාතිය රැකීමට නම් සියලු‍ දෙනා ධාර්මිකව ජීවත් විය යුතුය. බුදු දහම සුරැකිය යුතුය. එසේම ව්‍යාප්තවාදය මැඩපැවැත්වීමට සහ බුද්ධ ශාසනය රැකීමට අවශ්‍ය සියලු පියවර රජය විසින් ගත යුතුය. එවිට ජනතාවට විසිල් කාරයන්ගේ රැලි වලට අසු නොවී සිටිය හැකිය.

සංවාදයට විවෘතයි

Tuesday, September 29, 2015

මෛත්‍රී සහ බබා


          මෛත්‍රීපාල සිරිසේන යනු පක්ෂ භේදයකින් තොරව රට හරි මගට ගැනීම වෙනුවෙන් පත්කරගත් නායකයාය. ඔහු ජනපති තනතුරට පත්ව මේ දක්වා කළ කී බොහෝ දෑ විචාරශීලී බුද්ධිමත් සියලුදෙනාගේ පැසසුමට ලක්වූ බවද නොරහසකි. මනාප ප්‍ර‍තිඵල අනුව පරාජයට පත්වූ හිටපු මන්ත්‍රීවරුන් නැවත ජාතික ලයිස්තුව හරහා පාර්ලිමේන්තුවට රැගෙන ඒම යම් විවේචනයකට ලක්වුවද එය මනාප ක්‍ර‍මයේ අසාර්ථකත්වය සහ මහින්ද හිතවාදීන් ගෙනගිය මැතිවරණ ව්‍යාපාරය හා සම්බන්ධ කරගනිමින් සාධාරණීකරණය කළ හැකිය.
එහෙත් මෛත්‍රීපාල සිරිසේන ජනපතිවරයාගේ නායකත්වයෙන් යුත් ආණ්ඩුවේ අතිවිශාල ඇමති මණ්ඩලය සාධාරණීකරණය කරන්නට තරම් අවශ්‍ය සාධක මෙතෙක් අපට සොයාගන්නට නැත. නමුත් එම කාරණය අනාගත ව්‍යවස්ථා වෙනසක් සදහා අවශ්‍ය දොල පිදේනි පිදීමක් ලෙස අපට අනුමාන කළ හැකිය. එවැනි දොල පිදේනි පිදීමකින් හෝ රටට ගැලපෙන තක්කඩියන්ට රිංගා යා නොහැකි ශක්තිමත් ව්‍යවස්ථාවක් නිර්මාණය කරගත හැකි නම් රටේ අනාගනය වෙනුවෙන් එය හොද තීරණයකි. මන්ද යත් දැනට පාර්ලිමේන්තුවේ සිටින ඇතමුන් දේශපාලනයෙහි නිරතවන්නේ හුදෙක්ම ව්‍යාපාරික කටයුතු සහා වීම නිසාය. ඔවුන් රටේ අනාගතය වෙනුවට දකින්නේ තමන්ගේ අනාගතයය. පාර්ලිමේන්තුවේදී ඔවුනගේ අත එසවෙන්නේ රට වෙනුවෙන් නොව බඩ වෙනුවෙනි.  එසේම තම පැවැත්ම වෙනුවෙනි. එවැන්නන් ඇමතිධූරයක් හෝ එවැනි වරප්‍ර‍සායකින් තොරව රටේ යහපත වෙනුවෙන් සහයක් දක්වතැයි සිතිය නොහැකිය.
ඉතා සංයමයෙන් යුතුව එවැනි උපක්‍ර‍ශීලී නායකත්වයක යෙදෙන මෛත්‍රීපාල සිරිසේන ජනපතිවරයාට ඥාති සංග්‍ර‍ය සම්බන්ධයෙන්ද දැඩි චෝදනාවක් නැත. ටෙලිකොම් සභාපතිවරයා ලෙස තම සහෝදරයා පත්කළද ඔහු එම තනතුරට සුදුස්සෙක් වීම නිසා ඒ පිලිබද සමාජයේ දැඩි කතාබහක් ඇතිවූයේ නැත.  මහින්ද රාජපක්ෂ  ජනපතිවරයාගේ සමයේදී නාමල් රාජපක්ෂ මන්ත්‍රීවරයාට චෝදනා එල්ලවූයේ අනවශ්‍ය පරිපාලන සහ දේශපාලන මැදිහත්වීම් සම්බන්ධවය. එකී රජයේ පිරිහීමට බෙහෙවින්ම බලපෑවේ බැසිල් රාජපක්ෂ සහ නාමල් රාජපක්ෂගේ ක්‍රියාකලාපය බව මහින්ද හිතවාදීන් පවා දන්නා කරුණකි. එවැනි කාරනා මත බලය අහිමිවූ මහින්ද රාජපක්ෂ ජනපතිවරයා වෙනුවට මෛත්‍රීපාල සිරිසේන ජනපතිවරයාගේ මූලික වගකීම සහ යුතුකම වන්නේ තම පවුලේ අය දේශපාලන මැදිහත්වීම් වලින් ඉවත්කර තැබීමය. යම් මැදිහත් වීමක් සාධාරණ වුවද ජනතාවට ඇති අත්දැකීම අනුව සාධාරණීකරණය කිරීමට කිසිදු ඉඩක් නැත.
එවන් දේශපාල වටපිටාවක තම පුත්‍රයා එක්සත් ජාතීන්ගේ සමුලුවට රැගෙන යාමත් තම දියණිය පරිපාලන කටයුතු වලට මැදිහත් වීමත් කෙතරම් උචිත දැයි මෛත්‍රීපාල සිරිසේන ජනපතිවරයා තම හෘදසාක්ෂීයෙන් විමසිය යුතුය. ඔබට ජනතා වරම ලැබුනේ එවැනි දේකටදැයි ඔහු නැවත සිතා බැලිය යුතුය. එවකට පාර්ලිමේන්තු මන්ත්‍රීවරයකුව සිටියදීත් නාමල් රාජපක්ෂ හට එවැනි විරෝධයක් එල්ලවූ අතර කිසිදු දේශපාලන නියෝජනයක් නැති තවමත් ජනපති පුතු පමණක් වන දහම් සිරිසේන හට එවැන්නත් නොවේයයි සිතිය නොහැකිය. එතුමාට එවැන්නක් සිතිය නොහැකි නම් ජීවිත ගැනවත් නොසිතා එතුමා ජනපති කළ අපි හරක්ය, එතුමා බබාය. 

සංවාදයට විවෘතයි

Friday, August 28, 2015

මෛත්‍රී හටන


මෛත්‍රීපාල සිරිසේන මහතා ජනපති වූයේ රටේ ජනතාවගේ වාසනාවටය. ඉවක් බවක් නැති මහා පරිමාණ ණය ව්‍යාපෘති හරහා චීනය අප රට ගිලගනිමින් සිටිද්දී එය යම් පමණකට සමනය කරන්නට ලැබුණු විරාමයක් ලෙස ජනවාරි අටවැනිදා විප්ලවය හැඳින්විය හැකිය. එය විප්ලවයක් වන්නේ රජකු ලෙස පෙනී සිටි මහා පරිවාර බලයකින් හෙබි මහින්ද රාජපක්ෂ මහතා ප්‍රජාතන්ත්‍රවාදීව පරාජය කිරීමට හැකිවූ නිසාය. එසේම චීනය ණය ව්‍යාපෘති මගින් රට ගිලගන්නේ නම් දැන් එම ව්‍යාපෘති සිදුකරන්නේ චීනය නොවේදැයි ඔබ ප්‍රශ්න කරනු ඇත. එය සැබෑවකි. එහෙත් අප තේරුම් ගත යුත්තේ එම ව්‍යාපෘති වල කාලීන අවශ්‍යතාවයය. අප ව්‍යාපෘති කළ යුත්තේ අප රටට ඇති අවශ්‍යතාවය මත මිස චීණය ඒ සඳහා දක්වන උනන්දුව මත නොවේ. සෘජු විදේශ ආයෝජන ආයෝජකයාගේ යෝජනාවක් මත සිදු වුවත් එය එටට කෙතරම් උචිත දැයි අප තීරණය කළ යුතුය. ජනතාව පාලකයකු පත්කර ඇත්තේ ඒ සඳහාය. ජේම්ස් පැකර් කැසිනෝ ශාලාවක් ඇරඹීමට සූදානම් වූ පමණින් එයට ඉඩදීම පාලකයාගේ කාර්යභාරය නොවේ.

            ලෝකයේ මහාපරිමාණ ව්‍යාපෘති බොහොමයකට ණය පහසුකම් ලබාදීම චීනය විසින් සිදුකරනු ලැබේ. එහෙත් එම රටවල් ණය ලබාගන්නේ එකී රටට ඇති අවශ්‍යතාවය සහ ආපසු ගෙවීමේ හැකියාව මතය. ණය දෙන නිසා ලබාගෙන අවසානයේ ගමේ පොලී මුදාලිට කියන ලෙසින් මට සල්ලි නැතැයි කීමට ආණ්ඩුවකට නොහැක. රාජපක්ෂ ආණ්ඩුව අසීමිතව ණය ලබාගත් ආකාරය අනුව තව වසර කීපයක් ගතවූයේ නම් අප රටටද සිදුවන්නේ එවැන්නක්ය. මෛත්‍රීපාල සිරිසේන මහතා ජනපති වීම රටේ වාසනාවක් වන්නේ ඒ නිසාය.

මෙවර මහ මැතිවරණයේදී වුවද ජනපතිවරයා සිදුකලේ මහා සටනකි. මහින්ද රාජපක්ෂ මහතා අගමැති වීම ඔහු හිතාමතාම වැලැක්වුවේය. එය රටේ අවශ්‍යතාවයකි. මහින්ද රාජපක්ෂ අගමැතිවීම ජනවාරි අට ජයග්‍රහණය ආපසු හැරවීමකි. එහෙත් මහින්ද රාජපක්ෂ මහතා නැවත සක්‍රිය දේශපාලනයට නොආවේ නම් මෛත්‍රීපාල සිරිසේන මහතා මෛත්‍රීපාලනයක් පහසුවෙන් බිහිකරගනු ඇත. මහින්ද රාජපක්ෂ මහතා මැදට පැන මෛත්‍රීපාල සිරිසේන මහතාගේ ඡන්ද බොහොමයක් එජාපයට හරවා යැව්වේය. එසේ නොවන්නට සන්ධානය ඡන්දයෙන් ජයගනු නියතය.


දැන් වුවද ජනපතිවරයා සිදුකරන්නේ විශාල සටනකි. ඔහුට ශ්‍රී ලංකා නිදහස් පක්ෂය රාජපක්ෂලාගේ වහලුන්ගෙන් ගලවාගැනීමටද අවශ්‍යය. එසේම එජාප පාලනය සමග මෛත්‍රීපාලනය ඇතිකරන්න‍ටද අවශ්‍යය. එය සිතන තරම් පහසු කටයුත්තක් නොවේ. එහෙත් ඈත සහ මෑත අතීතයේ මෛත්‍රීපාල සිරිසේන චරිතය දෙස බැලීමේදී මේ සඳහා ඔහුට ඇති හැකියාව ප්‍රමාණවත් බව හැ‍ඟේ. රටවැසියන් ලෙසද ඒ සඳහා ඔහුට ශක්තියක් වීම අප සැ‍මගේ යුතුකමකි. ඒ ඔහු පරිපූර්ණ නිසා නොව අනෙකුත් නායකයන්ට සාපේක්ෂව ඔහු ඉතා ඉදිරියෙන් සිටින නිසාය. 

සංවාදයට විවෘතයි

Tuesday, August 11, 2015

එජාපය යන්නේ වැරදි පාරේ

ජනවාරි අටවැනිදා පෙරලිය එක්සත් ජාතික පක්ෂය තනිව කරන ලද්දක් නොවේ. එය ගෝත්‍රික පාලනයට එරෙහි ප්‍රජාතන්ත්‍රවාදයට කැපවූ සියලු ශ්‍රී ලාංකිකයන්ගේ උත්සාහයක ප්‍රතිඵලයකි. ඒ වන විට එජාපයට පැවතියේ ලක්ෂ හතලිහකටත් අඩු ඡන්ද ප්‍රමාණයකි. එය ලක්ෂ හැට දෙකක් දක්වා ඉහලට ගෙන ආවේ රාජපක්ෂ පාලනයේ අමිහිරි බව සහ මෛත්‍රීපාල සිරිසේන මහතා කෙරෙහි තිබූ විශ්වාසයද එකතුව මිස එජාප ආණ්ඩුවක් අවශ්‍යව තිබූ නිසා නොවේ.

ආණ්ඩුවක් පත්කරගැනීමේදී බහුතර ජනතාව ප්‍රතිපත්තිමය කරුණු වලට වඩා තමාට ලැබෙන සෘජු ලාභයන් සහ භෞතික සංවර්ධනයට මුල්තැන ලබාදෙයි. ආර්ථිකයට කුමන ඉරණමක් අත්වුවත් මහින්ද රාජපක්ෂ රජය විසින් ඉදිකරන ලද අධිවේගී මාර්ග ආකර්ෂණීය දෙයක් වන්නේ ඒ නිසාය. එසේම එල්ටීටීඊය මුලිනුපුටා දැමීම හේතුවෙන් අගුලු දැමුනු ඡන්ද විශාල ප්‍රමාණයක්ද මහින්ද රාජපක්ෂ මහතා සතුව පවතී. මෙසේ බලන විට එජාපය තවමත් සිටින්නේ සන්ධානයට පසුපසිනි
.
දැනට එජාපයට ඇති අභියෝගය වන්නේ හංසයාට ලැබුන ඡන්ද අලියා වෙත අද්දවා ගැනීමත්  සන්ධානයට ගියවර ඡන්දය දුන් විචාරශීලී පිරිසෙන් කොටසකගේ විශ්වාසය දිනා ගැනීමය. නමුත් මේ කාරණා දෙක සඳහා ඔවුනගේ ප්‍රචාරණ ක්‍රමවේදය හේතුවී ඇත්දැයි. ඇතිවන්නේ සැකයකි. රාජපක්ෂ පාලනයට දොස් නැගීමෙන් එය කළ හැකියයි එජාපය සිතන්නේ නම් එය අනුවණ කමකි. මන්ද යත් එමගින් සන්ධාන පාක්ෂිකයාට එජාපය කෙරෙහි ඇතිවන්නේ වෛරයක් පමණි. එය කිසි ලෙසකවත් ඡන්ද හැරවීමේ ක්‍රමයක් නොවේ.

    එජාපය පාර්ලිමේන්තුවේ වැඩි බලයක් ගෙන ආණ්ඩුවක් පිහිටුවීමට නම් අනුගමනය කළ යුත්තේ වඩාත් මෛත්‍රීසහගත සහ උපක්‍රමශීලී වැඩපිලිවෙලකි. ඔවුන් කිව යුත්තේ මහින්ද රාජපක්ෂ මහතා අධිවේගී මාර්ග ඉදිකිරීම යහපත් දෙයක් බවත් එවැනි යහපත් දේ වඩා වේගවත්ව දූෂණයෙන් තොරව ඉදිරියටත් ක්‍රියාත්මක කරන බවකි. ඒ ආකාරයට පසුගිය රජයේ තිබූ සියලු යහපත් දේ සම්බන්ධයෙන් කළයුත්තේ වඩා කෘතඥ සහ අවෛරී ප්‍රචාරණයකි.එවිට එජාප පිලිවෙත ගැන අධ්‍යයනය කරන්නට සහ ඒ වෙත ආකර්ශණය වන්නට යම් පසුබිමක් සැකසේ.  එසේ නොමැතිව ද්වේශය පැතිරවීමෙන් ජනතාවගේ සිත් ආකර්ශණය නොවේ. 

සංවාදයට විවෘතයි

Monday, March 23, 2015

යහපාලනය වහ වීම





රාජපක්ෂ පවුල් පාලනයට සමුදී ජනතාව විසින් මෛත්‍රීපාලනය ඇතිකර ගත්තේ පෙර පැවති පාලනයේ දුර්ගුණ වෙනුවට යහපත්වූ පාලන ක්‍රමයක් බිහිකර ගැනීමටය. එම පාලනය වෙනුවෙන් ඉදිරිපත්වූ පක්ෂ සහ සංවිධාන මෙන්ම ජනපති අපේක්ෂකයා වූ මෛත්‍රීපාල සිරිසේන මහතා පෙනී සිටියේ කෙටිකාලීන සහන වෙනුවෙට වඩා තිරසාර වූ ව්‍යවස්ථාමය ප්‍රතිසංස්කරණ වෙනුවෙනි. එම වෙනසට අදාල ක්‍රියාකාරකම් මෛත්‍රීපාල සිරිසේන මහතාගේ ප්‍රතිපත්ති ප්‍රකාශනය තුල අන්තර්ගත වූ අතර එම ක්‍රියාකාරකම් ඇතුලත්කර සැකසූ දින සියයේ වැඩසටහන විපක්ෂයේ මැතිවරණ ව්‍යාපාරය වඩා ආකර්ශණීය එකක් වන්නට හේතුපාදය විය.
    දින සියයේ වැඩසටහන තුල ආර්ථිකමය සහන ඇතුලත්කර තිබුනද එහි ප්‍රධානම අංගය වූයේ ප්‍රජාතන්ත්‍රවාදය ස්ථාපිත කරන ව්‍යවස්ථාමය වෙනස්කම්ය. එම වෙනස්කම් සඳහා අවශ්‍ය සහය පාර්ලිමේන්තුවේදී ලබාගැනීම එවකට අභියෝගයක් වුවද ජනපතිවරණ ජයග්‍රහණයෙන් පසුව මෛත්‍රීපාල සිරිසේන මැතිතුමාට ශ්‍රී ලංකා නිදහස් පක්ෂයේ සභාපතිත්වය ලැබීමත් සමග යම් අස්වැසිල්ලක් විය. දින සියයේ වැඩසටහන තුල සර්ව පාක්ෂික ඇමති මණ්ඩලයක් පිහිටුවන බව සඳහන් වුවද ජනපතිවරණයෙන් පසුව බිහිවූයේ එජාප බහුතර ඇමති මණ්ඩලයක් සහිත ආණ්ඩුවකි. එය මෛත්‍රීපාලනයක් වෙනුවෙන් කැපවූ එජාප පාක්ෂිකයන්ගේ උද්දාමයට හේතු වුවද මධ්‍යස්ථ පිරිස විමතියට පත්කිරීමටද එය හේතුවිය.
            කෙසේ නමුත් මන්දගාමීව හෝ දින සියයේ වැඩසටහන ඉදිරියට යද්දී ප්‍රජාතන්ත්‍රවාදයට මුවාවෙමින් මෛත්‍රීපාල සිරිසේන මහතාගේ නායකත්වයට ඉහලින් යමින් නිදහස් පක්ෂ පාර්ලිමේන්තු කණ්ඩායම එජාප ආණ්ඩුවේ ක්‍රියාකාරීත්වය වැටබඳින්නට උපරිම උත්සාහ ගත්හ. දූෂණ අක්‍රමිකතා සඳහා සඳහා විරෝධය පළකිරීම රටට යහපත් කාරණයක් වුවද ව්‍යවස්ථාමය වෙනස්කම් සඳහා අවශ්‍ය සහයෝගය ලබාගැනීමේදී ප්‍රතිගාමී විවේචන එල්ලකිරීමක්ද දක්නට ලැබීම රටට උදාවූ අවාසනාවන්ත තත්වයක් විය. එම කාරණය මත යහපාලනයක් වෙනුවෙන් ප්‍රති‍ඥා දුන් මෛත්‍රීපාල සිරිසේන ජනපතිවරයාට පාර්ලිමේන්තුව තුල ව්‍යවස්ථා සංශෝධන සඳහා සහයෝගය ලැබේදැයි ඇතිවූයේ සැකයකි.
            19වන සංශෝධනය යනු රට නිසි මගට ගැනීම සඳහා අත්‍යාවශ්‍ය ප්‍රතිසංස්කරණයකි. නමුත් දේශපාලන බල අරගලයක ‍ පැටලී සිටින දේශපාලකයන්ට ඒ පිළිබඳ තැකීමක් නැත. තම දේශපාලන පැවැත්ම මිස රටේ හෙට දවස ගැන නොසිතන දේශපාලකයන් 19 වන සංහෝධනයට පාර්ලිමේන්තුව තුල විරුද්ධ නොවනු ඇතැයි අපේක්ෂා කළ නොහැකිය. එසේම ‍පාර්ලිමේන්තුව තුල නූගතුන්, එතනොල් ජාවාරම්කරුවන්,  කුඩු ජාවාරම්කරුවන්, මැරයන් සහ දූෂීතයන් සිටින බවද නොරහසකි. රටේ රාජ්‍ය යාන්ත්‍රණය දේශපාලනීකරණයෙන් මුදවාලූ විට එවැන්නන්ට අනාගතයක් නැතිවීම හේතුවෙන් ඔවුන් මෙවැනි සංශෝධන ගෙනඒම වලක්වාලීමට හැකි හැම පියවරක්ම ගනු ඇත. ඇතමුන් සිතන ලෙස හොඳ දේට සහය නොදී සිටින්නේ කෙලෙසදැයි යන්න දූෂිතයන්ට අභියෝගයක් නොවේ.
      එවැනි වටපිටාවක රටට අත්‍යාවශ්‍ය ප්‍රතිසංස්කරණ වෙනුවෙන් අවශ්‍ය බලය ගොඩනගාගැනීම සඳහා යම් සීමාව ඉක්මවූ පියවරයන්ට එළඹීමට වත්මන් ජනපතිවරයාට සහ අගමැතිවරයාට සිදුවී තිබේ. ඉතාම කෙටිකළක් සඳහා ජාතික ආණ්ඩුවක් පිහිටුවීමේ අරමුණ එම දේශපාලනික බලය ගොඩනගාගැනීම මිස පුද්ගලයන් සතුටුකිරීම නොවේ.  එවැනි ආකාරයකට හෝ මෙම ව්‍යවස්ථා සංශෝධනය සිදුකර නොගතහොත් අපට උදාවූ ස්වර්ණමය අවස්ථාව ගිලිහී යනු ඇත. අප රට සැමදා තනි පුද්ගල අභිලාශ වෙනුවෙන් ඒකාධිපති පාලකයන්ගේ ග්‍රහණයේ පවතිනු ඇත. එබැවින් මෙම දේශපාලනික තත්වය බුද්ධිමත්ව වටහා ගනිමින් ‍ඉදිරි කෙටි කාලසීමාව පාලන ක්‍රමයේ වෙනසක් වෙනුවෙන් පෙනී සිටීම අප සැමගේ වගකීමකි. 

සංවාදයට විවෘතයි